На 23 мај беше отворена Изложбата „Растенијата на планината Јабланица“ чиј автор е Данче Аџиоски – Виш кустос биолог.
Оваа изложба е резултат на нејзината долгогодишна работа и теренски истражувања на различни локалитети на Планината Јабланица, преку кои успеала да собере и документира голем број растителни видови кои ја карактеризираат самата планина.
Ќе се запознаете со ендемичните и ретки видови растенија, лековитите растенија, блатните растенија кои се развиваат околу четирите глацијални езера и други растителни видови карактеристични за оваа планина.
Со оваа изложба сакаме да ја приближиме ботаниката до сите генерации – да покажеме дека растенијата не се само украс, туку и сведоци на биолошка еволуција, еколошки индикатори и вреден ресурс што заслужува заштита. Преку оваа изложба не само што ја поттикнуваме јавната свест за зачувувањето на природата, туку и ја јакнеме врската помеѓу науката и културата – истакна Данче.
Изложбата ја отвори почитуваниот и ценет ботаничар и истражувач – Академик Владо Матевски, а свое обраќање имаа и директорката на НУ Музеј Д-р Никола Незлобински – Цветлана Василевска и почитуваната М – р Оливера Матевска, кустос советник во Природонаучниот Музеј во Скопје.
Изложбата е организирана од НУ Музеј Д – р Никола Незлобински – Струга, а поддржана од Министерството за култура и туризам.
StrugaOnline
Facebook Коментари