Во Струга успешнo релизирана обука за инклузивно волонтирање од страна на тимот на Спортскиот клуб „Соларис“

Изминатиот викенд (19 -20. 09. 2025 г.), тимот на Спортскиот клуб „Соларис“ со успех ја организираше инклузивна дводневна обука за млади волонтери во рамки на проектот ВоБеХа (Volunteering Beyond Handicaps – VoBeHa).

Оваа обука со мото „Ако секој добие шанса да придонесе, сите растеме“ обедини мотивирани млади луѓе со различни способности, желни да научат како активно да учествуваат на спортски настани. Преку интерактивни сесии, игри и практични вежби, учесниците на обуката стекнаа вредни знаења за улогата на волонтерите на спортски настани. Вештини за комуникација и поддршка, безбедност и грижа, како и практични задачи за секоја од волонтерските позиции беа активни теми на дискусија и совладување.

Обуката исто така вклучуваше тимски активности кои ги подготвија младите волонтерите за вистинските одговорности при претстојните спортски настани на кои тие ќе волонтираат. На крајот на обуката учесниците добија сертификати за нивната ангажираност.

Претставниците на клубот потенцираа дека оваа обука претставува клучен чекор во градењето инклузивни можности за волонтирање, каде младите без разлика на способностите можат да се вклучат, придонесат и развиваат. Проектот ВоБеХа е посветен на зајакнување на младите преку волонтирање во спортот, промовирање на инклузивноста и јакнење на заедничката поврзаност.

Овој проект е финансиран од Европската Унија во рамки на програмата Еразмус+ Спорт и се спроведува во партнерство со Заедницата на спортови на Дубровник (Хрватска), Каргенц Клуб (Турција) и Спортскиот клуб Соларис (Македонија).

StrugaOnline