Познати добитниците на Повелбата-Патрон на градот „Свети Климент Охридски“

Од Општина Охрид ги објавија добитниците на општинската награда и повелбите „Св. Климент Охридски – Патрон на градот Охрид“.

Новинарот, публицист и хроничар Владимир Ангеличин-Жура постхумно е добитник на највисоката општинска награда „Св. Климент Охридски – Патрон на градот Охрид“. ‎Одлуката ја донесе петчлената комисија во состав: Перчо Божиновски – претседател, и членовите Горан Стојаноски, проф. д-р Татјана Димоска, Славе Ѓорѓо-Димоски и Горан Патчев.

‎Владимир Ангеличин-Жура (1946–2025) остави трага во охридската новинарска и културна историја. Бил уредник на Радио Охрид (1961-1975), а подоцна и уредник на весникот на ГП „Трудбеник“ (1975-1997). Автор е на голем број написи во дневниот и седмичниот печат, како и на значајни радио и телевизиски истражувачки емисии посветени на охридското минато. Неговиот опус опфаќа и циклус од 20 получасовни радио емисии за охридската староградска песна и 15 телевизиски емисии инспирирани од трубадурската охридска песна. Особено важни се и неговите истражувања во областа на генеалогијата на старите охридски семејства.

НУ „Завод и Музеј“ Охрид, Јорданка Матова, „Силви Бенд“, Даниел Јовески и The Backdoor Band се годинешни добитници на Повелбата-Патрон на градот „Свети Климент Охридски“.

Оваа одлука ја донесе Комисијата за одбележување празници и манифестации и доделување награди и признанија при Општина Охрид врз основа на Конкурсот за доделување Повелба – Патрон на градот „Св. Климент Охридски“ за 2025 година.

– НУ „Завод и Музеј“ Охрид во своето речиси 70 годишно постоење се етаблира како една од најзначајните, најстручни и најпосветени културни интитуции во Охрид и државата. Музејот е наследник на најстарите музејски традиии во Европа. Со својата богата дејност, институцијата континуирано придонесува за зачувување, истражување и промовирање на културното наследство на Охридскиот регион.

– Јорданка Матова е историчар на уметност од Охрид. Нејзината посветеност кон уметноста и музеологијата опстојува повеќе од три децении. Таа има богата кариера со бројни истражувања, изложби и научни публикации.

– „Силви Бенд“ се музичко брачно дуо на Силви и Влатко Плевнеш кои имаат значаен придонес за музичката култура во Охрид и државата. Нивната музика, нивните песни и нивниот партципативен дух ја надминуваат димензијата на естрадна забава. Во 2025 година, „Силви бенд“ го прослави својот 35-годишен јубилеј.

– Даниел Јовески е режисер, продуцент и музичар. Продуцира музички видеа и аудио-визуелни проекти, со што ја промовира македонската музичка сцена во регионот и пошироко. Јовески е добитник на бројни меѓународни награди и признанија.

– The Backdoor Band како музички состав со преку 1.500 настапи редовно учествува на фестивали, концерти, останати културни настани во нашиот град. Тие се 15 години на музичката сцена и се редовни иницијатори и организатори на бројни хуманитарни настани.

StrugaOnline