Шесто издание на културната манифестација „На зајдисонце“ 2017 во Трпејца

Од 20 до 28 јули во Трпејца ќе се одржи шестото издание на  културната манифестација „На зајдисонце“ 2017.

Свеченото отворање е закажано за 20:30 часот, со изложбата насловена како „Допри ме како што ме допира сонцето“ на Наташа Попоска – Карче, по што ќе следи музички перформанс на Горан Папаз.

Во склоп на програмата предвидено е свои концерти да одржат КУД „Гердан“, ансамблот „Билјана“ и градскиот хор „Вокс Лихнидос“, а предвидена е и вечер со актерката Марија Новак.

Посетителите на манифестацијата ќе имаат можност да ги проследат проекциите: „Чиста вода“ на Мунлајт Продукција и Делегеација на ЕУ во Македонија, по сценарио на Јана Коцевска, во режија на Димитар Сеизов и „Танцот на пастрмките“ на нуркачкиот центар „Амфора“, по сценарио и режија на Милутин Секулоски, а предвидена е и презентација НП „Галичица“ – Охрид насловена „Галичица на дофат“.

Предавање на тема„Зависностите на модерното време“  ќе одржат претставници од НВО „Опција“ – Охрид.

Во текот на деветте дена ќе се одржат и традиционалните школи за пливање, шах и англиски јазик, а ќе биде одржана и кајакарската регата „Номче Митрески“.

На последниот ден од манифестацијата (28-ми јули)  ќе се реализира заеднички излет на домаќините и гостите „По патеката Чоколско“.

Организатор на манифестацијата „На зајдисонце“ е Здружението за развој и промоција „За Трпејца со Љубов“ од Охрид. Оваа манифестација секоја година се одржува во овој период од месец јули и негува посебна  традиција

Извор: Strugaonline

Фото: „На зајдисонце“