Пионерките на ЖРК Струга 2024 продолжуваат со максимален учинок – трета победа во низа

Пионерките на ЖРК Струга 2024 продолжуваат со одличните настапи во лигата, откако ја забележаа третата победа на исто толку натпревари. Стружанките на домашен терен славеа против КХФ Јехона со 20:14, во натпревар во кој од самиот почеток ја контролираа играта и резултатот.

Ракометарките на ЖРК Струга 2024 уште еднаш покажаа квалитет и тимска игра, совладувајќи ја екипата на КХФ Јехона со убедливи 20:14. Стружанките го презедоа водството уште на почетокот на средбата и со сигурна игра го задржаа до самиот крај, за нов значаен триумф во пионерската конкуренција.

Посебно радува фактот што стручниот штаб им даде можност за настап на сите ракометарки, овозможувајќи им да придонесат на теренот, но и да стекнат драгоцено натпреварувачко искуство.

Во листата на стрелци кај ЖРК Струга 2024 се издвоија Елена Ѓонеска со 9 погодоци и Мила Илоска со 3 гола, додека останатите ракометарки придонесоа за тимскиот успех. Кај гостинската екипа, најефикасна беше Ерина Хасани со 8 погодоци.

Со оваа победа, пионерките на Струга го задржуваат максималниот учинок од три победи во три натпревари, што претставува одличен почеток на сезоната и дополнителен мотив за продолжување со добрата работа.

Од клубот порачуваат дека продолжуваат со посветена работа, со јасна цел за постојан напредок и развој на младите ракометарки.

StrugaOnline