Доделени најзначајните награди на СВП

Претпоследниот ден на овогодинешните 56-ти Струшки вечери на поезијата беше резервиран за   излет до манастирот Св. Наум со брод и посета на изворите на реката Црн Дрим. Потоа, во предворјето на манастирот се одржа  поетско читање. Во 15и30 часот се случи  прогласувањето  на најдобрата песна посветена на виното.

Во вечерниот термин од 20:30 часот на мостот на поезијата во Струга  се одржа меѓународното поетско читање „Мостови“, а  свечено беа врачени и наградите „Златен венец“, „Браќа Миладиновци“ и „Мостови на Струга“.

На полноќ беше прогласен добитникот на наградата „Енхалон“. Наградата ја доби младиот и талентиран поет Јосип Коцев, за песната “Етна” од збирката “Јас, Quentin Scribbler”

Со традиционалната манифестација „Мостови“ заврши програмата во Струга. Денеска, за крај на 56-те Струшки вечери на поезијата во 13:00 часот ќе се одржи  Поетско матине Матка во Манастир Св. Андреја, Матка, а во  20:30 на –Плоштад „Македонија“ кај Камениот мост  во Скопје ќе се одржи  Меѓународен поетски митинг. 56-тите Струшки вечери на поезијата понудија богата програма правејќи ја Струга центар на светот за 30-тина поети од сите краеви на светот и за сите љубители на поезијата.