„Животот е краток, а чувствата големи. Не знам колку полни месечини ќе видам, ниту колку фамилијарни ручеци ми остануваат. Затоа, сакам да го прославиме животот таков каков што е, со музика, со искреност – и без инает“, вели Владимир Четкар, познатиот џез гитарист со светска кариера.
Со овие зборови, Четкар го најавува својот четврти студиски албум „Let Us Be“, кој премиерно ќе го претстави на 8 мај во Јавна соба (Public Room) во Скопје. Настанот е старт на неговата интернационална турнеја, која потоа продолжува низ САД и Јапонија.
Албумот „Let Us Be“ е снимен во Чикаго и Милвоки, со повеќе од 40 музичари. Целосната продукција е под капата на самиот Четкар – од композиција до аранжман, продукција и изведба. Објавен ексклузивно преку јапонската етикета P-Vine Records, веќе стои на полиците покрај имиња како Брус Спрингстин и Џими Хендрикс.
На концертот на 8 мај, македонската публика ќе има шанса прва да ги чуе композициите од новиот албум – пред публиката во Њујорк, Чикаго или Осака. По концертот во Јавна соба, турнејата продолжува во Чикаго, Њујорк, Детроит, Кливленд, Колумбус, а потоа и во Јапонија – Осака и Кобе.
StrugaOnline
Facebook Коментари