До нашата редакција пристигна реакција за нелегална градба во Струга од група стружани кои побараа да бидат анонимни.
Нивното писмо ви пренесуваме во целост:
Почитувани,
Во интерес на сите граѓани на Струга, Ви се обраќаме Вам за еден горлив случај, кој веќе подолго време станува болна точка на нас стружаните. Имено, пред црквата Св. Ѓорѓија во Струга има времен објект трафика, од времето и типот на полипласт, која сопственикот постојано ја проширува, доградува и надградува, а со тоа го попречува и нагрдува влезот на црквата, узурпира јавен простор и ја нарушува глетката и силуетата на црквата. Бидејќи знаеме дека таа е поставена како времен објект на државно земјиште и нема право на никакви промени, се’ до донесување на нов урбанистичи план, ние се обративме до градежната инспекција, која за жал, не презеде ништо, а нејзиниот сопственик за време на викенди и празници, кога службите не работат, ја проширува и доградува. Поради неажурноста на службите, одлучивме да побараме помош од вас, со тоа што случајов ќе излезе во јавноста, и на тој начин ќе ги поттикнеме службите и градоначалникот Мерко да преземат активности за спречување на вакви нелегални дејствија.
Во прилог ви испраќаме неколку слики од првичниот изглед, до сегашното нагрдување. Се надеваме дека со ваша помош, објектот ќе биде отстранет од службите, како што ги отстранија и трафиките лево и десно, за кои сведочат постаментите, просторот пред црквата ќе се ослободи, уреди и ќе добие нов лик за урбано живеење и лице на градот за туристите.
P.s. Мораме да бидеме анонимни поради сопствена безбедност.
Со почит,
Стружани за Струга
StrugaOnline
Facebook Коментари