Исчистени повеќе мини-депонии во Струга, ЈП Комунално со апел до граѓаните да престанат со незаконско фрлање отпад

Вчера, екипите на ЈП Комунално Струга спроведоа акција за расчистување на неколку мини-депонии, настанати како резултат на незаконско фрлање инертен отпад, градежни материјали и остатоци од малтерисување на улици и јавни површини.

Од ЈП Комунално Струга информираат дека ваквите дејствија претставуваат сериозно прекршување на законските прописи и директно ја нарушуваат животната средина, јавниот ред, како и имиџот на градот.

Воедно, упатен е последен апел до граѓаните веднаш да престанат со фрлање отпад на несоодветни локации. Секој нов констатиран случај, како што се најавува, ќе биде третиран без толеранција.

Комуналните инспектори се веќе известени и ќе вршат засилени контроли на терен. Прекршителите ќе бидат идентификувани и ќе се соочат со соодветни санкции и парични казни, согласно важечките законски прописи.

Надлежните апелираат до граѓаните за поголема одговорност и почитување на јавниот простор, со цел заеднички да се придонесе кон почиста и поздрава животна средина.

StrugaOnline