Вчера во Државното музичко училиште Струга се одржа традиционалната манифестација по повод Денот на јазиците
Вчера во Државното музичко училиште Струга се одржа традиционалната манифестација по повод Денот на јазиците и забава за добредојде за учениците од прва година.
Настанот беше организиран од страна на професорките по македонски јазик, Марија Савеска и италијански јазик, Ѓурѓица Кутаноска, со поддршка од професорките по француски јазик, Симона Кленоска и Александра Димоска. Прилог кон организацијата дадоа и професорите по албански јазик, Љаргета Лита, англиски јазик Сања Балоска и Елмедина Колоња, француски јазик Мендерес Љумани и германски јазик Рудина Крека Купа.
Настанот започна со свечено обраќање во кое беше истакната важноста на јазиците како средство за комуникација и размена на култури. Потоа, учениците имаа можност да учествуваат во различни игри и активности, кои се одржаа во пријатна и весела атмосфера.
Меѓу највпечатливите игри беа „Музичко столче“, „Игра на јазици“ и „Скокање со вреќи“. За финалето, учениците играа „чудно оро“ на музика од Мајкл Џексон, што дополнително ја раздвижи атмосферата и донесе многу смеа.
„Оваа манифестација не само што e одлична можност учениците да се запознаат, туку и да се забавуваат, учејќи важни животни лекции за вредноста на различноста и културната разноликост“ – велат од организаторите.
StrugaOnline
