МОН: Oдлуката за пониска цена на електричната енергија за училиштата значи обезбедување континуитет на наставата со физичко присуство
Владината мерка за снабдување на училиштата со електрична енергија по субвенционирана цена од 95 евра за мегават/час е голема поддршка за непречено организирање на наставата во форма која е од најголем интерес за учениците – со физичко присуство во училниците, велат од министерството за образование и наука.
– Во услови на прогласена кризна состојба, со склучување на договор за снабдување со електрична енергија со ЕСМ Продажба, тие ќе создаваат значително помали расходи во општинските и државниот буџет, со што, се зголемува сигурноста дека воспитно – образовниот процес во училиштата ќе продолжи да се реализира непречено до крајот на годината, додаваат од министерството.
Од таму уште еднаш апелираат сите образовни институции и установи доследно да ги почитуваат владините препораки за рационално користење на електричната енергија. Затоа што, како што велат, штедењето на електричната енергија е еден од факторите кои влијаат на одржливоста на наставата во училниците, но од друга страна се подигнува стабилноста на енергетскиот систем и се обезбедува доволно електрична енергија за потребите на домаќинствата.
