Одржано 68. доделување на музичките награди „Греми“ во Лос Анџелес
Во неделата во арената „Crypto.com“ во Лос Анџелес се одржа 68. издание на престижните музички награди „Греми“, со кои беа одбележани најдобрите музички остварувања во периодот од август 2024 до август 2025 година. Годинешната церемонија имаше и симболично значење, бидејќи беше последната што се емитуваше на телевизиската мрежа CBS и се стримуваше на платформата Paramount+, со што беше затворено едно долгогодишно телевизиско поглавје во историјата на наградите.
Во најважните категории, наградата за Песна на годината ја освои Billie Eilish со „Wildflower“, додека Аудио запис на годината (Record of the Year) ѝ припадна на соработката помеѓу Kendrick Lamar и SZA за песната „Luther“.
За Албум на годината беше прогласен Bad Bunny со Debí Tirar Más Fotos, а за Најдобар нов артист беше избрана Olivia Dean.
Во поп и денс категориите доминираше Lady Gaga, која ја освои наградата за Најдобар поп вокален албум со Mayhem, како и признанието за Најдобра денс/поп снимка со „Abracadabra“. Lola Young беше наградена за Најдобра поп соло изведба со „Messy“, додека Cynthia Erivo и Ariana Grande победија во категоријата Најдобра поп изведба на дуо/група со „Defying Gravity“.
Во денс/електронската музика, признанијата им припаднаа на Tame Impala за „End of Summer“ и на FKA Twigs за албумот Eusexua.
Во латино категориите, Bad Bunny повторно беше меѓу најнаградуваните, освојувајќи ја наградата за Најдобар албум од „música urbana“, додека Natalia Lafourcade беше прогласена за победник во категоријата Најдобар латино поп албум со Cancionera.
Рок и алтернативната сцена беше обележана од Turnstile и The Cure. Turnstile ја освоија наградата за Најдобар рок албум со Never Enough, како и признанието за Најдобра метал изведба со „Birds“. The Cure пак триумфираа со Најдобар албум на алтернативна музика (Songs of a Lost World) и Најдобра изведба на алтернативна музика со песната „Alone“.
Во рап категориите апсолутен победник беше Kendrick Lamar, кој ги освои наградите за Најдобар рап албум (GNX), Најдобра рап песна („TV Off“) и Најдобра мелодична рап изведба со „Luther“, во соработка со SZA.
Во R&B и афробитс категориите се истакна Kehlani, која победи и за Најдобра R&B изведба и за Најдобра R&B песна со „Folded“, додека Tyla ја освои наградата за Најдобра изведба на африканска музика со „Push 2 Start“.
Меѓу продукциските признанија, за Продуцент на годината (некласична музика) беше прогласен Cirkut, а наградата за Текстописец на годината ја доби Amy Allen.
Во филмските и телевизиските категории се истакна проектот Sinners, со награди за најдобар компилациски саундтрак и најдобра оригинална музика, додека легендарниот композитор John Williams беше награден за Најдобар музички филм.
StrugaOnline
