Богата програма со филмски проекции, едукативни работилници и музички перформанси најавуваат од дирекцијата на Фестивалот на нов европски филм „Beach film festival“ што од утре до 21 јули ќе се одржува на четири локации во Охрид.
-Фестивалот ќе биде отворен со филмот „Живи и здрави“ (Forever hold your peace), а во главната програма ќе бидат прикажани уште шест долгометражни европски филмови, и тоа: „Rodeo“, „Summer to come“, „Afire“, „Milk“, „Some birds“ и „Pelican“. На Фестивалот ќе бидат прикажани и 14 краткометражни филмови, вклучувајќи и филмови од домашната продукција, односно филмовите на Ана Јакимска, Елеонора Венинова, Јане Спасиќ и Димитар Банов, а за музичката програма ќе се погрижат бендовите „Sioto Jazz“ и „Xarakiri“, диџејките Baila, Dj MarТian и музичкиот дует SIZ.-соопштија од Министерството за култура
Оттаму додаваат дека четиричлено жири ќе ги додели наградите „Голем бран“ за најдобар долгометражен филм и „Стефан Сидовски-Сидо“ за најдобро актерско остварување. Исто така, оформено е и тричлено жири што ќе ја додели наградата „Мал бран“ за најдобар краткометражен филм. Новитет годинава е филмската програма за најмладите.
-Фестивалот, кој од година во година станува препознатлив бренд на летната сезона во Охрид, започнува со уште еден тип програма – филмови за најмалите посетители и нивните блиски, кои ќе бидат прикажани на градската плажа „Сараиште“, каде што секој ден од 17 до 21 јули со почеток во 20:00 часот ќе има проекции на детски филмови, а влезот за нив ќе биде бесплатен.-информираат од Министерството за култура.
Фестивалот се одржува на четири локации и тоа: плажа „Славија“, брод „Армада“, плажа „Сараиште“ и Младински центар Охрид.
Strugaonline
Facebook Коментари