Фестивалот „Drim Short 2018“ годинава добива интернационален карактер
Дирекцијата на „ДримОН“ го најавува второто издание на Фестивалот на краток филм Drim Short 2018, кој оваа година од 12-14 октомври ќе се одржи во НУЦК „Браќа Миладиновци“ Струга.
Минатата година фестивалот привлече големо внимание и кај публиката но и кај филмската фела во Македонија. Затоа, организаторите годинава нудат проширена програма и разновидност во филмската понуда, како за гледачите, така и за учесниците.
-„Наша желба и оваа година е да додадеме свежи бои на есенската културна понуда во градот, преку диверзитетна програма на кратки филмови. Ползувајќи ја универзалноста на филмскиот јазик и комуникацијата со публиката, под мотото „Еден јазик, илјада приказни“ сакаме и оваа година да ја доближиме кратката филмска форма до публиката, да ја зајакнеме филмската култура во градот и да придонесеме Струга да стане регионално филмско јадро за филмските уметници од Македонија и регионот.-велат организаторите.
Тие исто така додаваат дека фестивалот Drim Short 2018 добива интернационален карактер. Па така, покрај стандардната национална програма, ќе има и регионална селекција на кратки филмови, како и студентска програма, во која студентите од Македонија ќе имаат можност да ги претстават своите дела.
„Истовремено оваа година ќе дадеме шанса на идеите и сценаријата, при што ќе бидат избрани пет најдобри идеи на млади автори од Македонија, кои ќе се натпреваруваат за симболична награда, што ќе претставува мотив за нивната понатамошна работа и однос кон филмот.“ -информираат од ДримОН.
Покрај филмската програма, годинава фестивалот е домаќини и на неколку еминентни филмски имиња од Македонија и регионот. Тие ќе ја збогатат филмската програма со своето искуство поврзано со филмот и истото ќе го пренесат пред младите автори и студенти.
Strugaonline
