Центарот за подобрување на квалитетот на живот на лицата со интелектуални попречености и нивните фамилии ,,Порака Нова“-Струга ,денеска одбележува 40 години од постоењето посветено на заедницата и креирање позитивни промени кај маргинализираните групи.
-Од 1984 година па до ден денеск, Порака Нова е во мисија да ги зајакне лицата со попреченост, да ги охрабри младите да се напредуваат професионално и лично, како и да ги поттикне социјалните иновации во општеството. Патот од 40 години го карактеризираат издржливост, посветена работа и безброј инспиративни приказни за трансформација. Од рушење на бариерите до поттикнување инклузија, сведоци сме на силата што произлегува од единството и различноста на оваа организација.-изјави за Strugaonline Росица Стојковска -Живковска, маркетинг менаџер во ,,Порака нова“.
Со 40 годишното постоење Порака Нова досега организирала повеќе од 1000 настани на локално и интернационално ниво, 10 години успешно е партнер на Лице в Лице во продажбата на списанието, а го имаат и првиот вработен продавач.
-Организацијата има имплементирано повеќе од 150 проекти во партнерство со земји од Азија, Европа и Африка. Услугите досега ги имаат користено повеќе од 1000 лица со попречености, а повеќе од 40 лица со попречености се успешно вработени преку посредување на Порака Нова со општествени одговорни компании.-потенцира Живковска.
Таа додава дека Порака Нова ќе продолжи да ги охрабрува и зајакнува сите, позитивно да влијаат во својата заедница.
-Ајде да продолжиме да иновираме, да промениме нечиј живот на подобро, да се залагаме за маргинализирани групи и да создаваме свет во кој секој има можност да учествува и блесне – е главната порака на оваа организација.
Strugaonline
Facebook Коментари