Тодорче Тасевски: Во полн ек се подготовките за јубилејното издание на СВП, стихови од Блаже Конески ќе се читаат на повеќе јазици

Во рамки на денешното Play cafe на Play radio, зборувавме за Струшките вечери на поезијата, манифестација која не само што ја негува и секоја година ја продолжува својата традиција, туку се грижи и за зачувување на сите документи, снимки, рачни ракописи од голем број поети ширум светот, истите сега го красат Државниот архив на Македонија-одделение Охрид.

Директорот на СВП,  Г-дин Тодорче Тасевски истакна дека соработката со охридскиот архив се реализираше со цел овие значајни книжевни документи и аудио-визуелни материјали да бидат соодветно заштитени , зачувани за идните генерации, но да бидат и соодветно презентирани и достапни за истражувачката фела.

Во полн ек се и подготовките за големиот јубилеј , во авгсут ќе се одржи шеесеттото издание на манифестацијата ,,Струшки вечери на поезијата“.

-Да се организира толку значаен јубилеј е голем предизвик и во стандардни услови, а во пандемија посебно. Минатата година поетите од странство беа претставени преку видео читања, годинава поголем дел од нив ќе бидат физички присутни во Струга. Поканите се веќе испратени и голем дел од поетите го потврдија своeото присуство.  И во услови на пандемија ќе имаме достојно јубилејно издание.Шармот на оваа манифестација ќе се врати целосно тогаш кога ќе заврши пандемијата, бидејќи нејзиниот шарм е во нејзиното одржување на јавен простор, а тоа сега не е можно. Нашата цел е да бидеме креативни, во услови на пандемија треба да се избере и соодветен простор и да се зачува сјајот на манифестацијата – вели Тасевски.

Годинава СВП ќе го чествува и ликот и делото на великанот Блаже Конески

-По повод 100 години од раѓањето на Блаже Конески за оваа година е планиран посебен програмски дел посветен на неговиот лик и дело. Ќе биде промовирана монографија со поезија и проза на Конески, ќе бидат претставени илустрации инспирирани од Блаже Конески, а неговите стихови ќе се читаат на повеќе јазици. –информираше директорот на СВП.

Со Тодорче Тасевски разговаравме и за неговата борба со ковид 19 и добивме убави вести.

,,Мојата објава за мојата борба со ковид 19 имаше една цел – да упатам апел до граѓаните да бидат максимално внимателни. Голготата помина, со полна пареа се враќам на своите работни обврски,,-изјави Тасевски.

Целиот разговор можете да го проследите во следново видео:

Извор: Плеј радио

фото: архива