Охрид SOS со петиција за спас на Преспанското Езеро

Граѓанската иницијатива Охрид ЅОЅ, поддржана од многубројни организации, покрена петиција за спас на Преспанско Езеро со конкретни барања до Владата.

Преспанското Езеро е едно од најстарите езера во светот чија старост се проценува на 3 до 5 милиони години. Заедно со Охридското Езеро со кое прави една единствена, неразделна геохидролошка целина, претставува исклучително значаен локалитет во светски рамки истакнат по својот богат биодиверзитет и ендемизам, стои во барањето.

– Преспанското Езеро се наоѓа на листата на најважни орнитолошки локалитети во Европа од 2008 година, како и на најважни водни живеалишта во светот – прогласено е за Рамсарско подрачје во 1995 година и е едно од само две во Македонија. Сведоци сме дека во последните неколку децении нивото на Преспанското Езеро драстично се намалува (~8 m) што значи повлекување на езерото од повеќе десетици метри на некои делови. Во моментот, нивото на Преспанско е најниско од кога се вршат мерења (1917 г.) што е цел еден век и состојбата е крајно алармантна!, велат од Охрид ЅОЅ.

Поради ваквата алармантна состојба бараат од Владата итно преземање на мерки за спас на езерото. Барањата се:

• итно и неодложно да се прогласи кризна состојба на целото подрачје на сливот на Преспанското Езеро.
• најитно формирање научно/техничка комисија за спас на Преспанското Езеро која ќе ја проучи ситуацијата и ќе предложи итни мерки за подобрување на состојбата најдоцна за 10 дена од објавувањето на петицијата.
• Владата итно да иницира меѓудржавна средба на експертско ниво заедно со релевантни организации вклучени во Преспанскиот Регион која координирано ќе работи на проблемот.
• Владата да дефинира фазен план за спас на Преспанско Езеро со јасно утврдени рокови.
• Во согласност со начелата од Архуската конвенција преточени во националната легислатива, информациите за планот и сите преземени активности седмично да се ажурираат на веб-страницата на МЖСПП и да бидат лесно достапни за јавноста.