Соларен саем утре во Струга, граѓаните ќе се информираат за придобивките од сончевата енергија

Струга утре, 23 јуни ќе биде домаќин на Соларен саем посветен на сончевата енергија и обновливите извори на енергија. Настанот ќе се одржи пред зградата на Општина Струга во периодот од 17:30 до 20:30 часот.

Целта на саемот е да ги запознае граѓаните со можностите што ги нуди користењето на сончевата енергија, како и со придобивките од инсталирањето фотоволтаични системи во домаќинствата.

Посетителите ќе имаат можност да добијат корисни информации за современите енергетски решенија, начините за намалување на трошоците за електрична енергија и придонесот кон заштитата на животната средина преку користење обновливи извори на енергија.

Организаторите најавуваат информативна и едукативна програма, наменета за сите граѓани кои сакаат да дознаат повеќе за одржливите енергетски практики и можностите за создавање поефикасна и позелена иднина.

Соларниот саем ќе се одржи на 23 јуни пред Општина Струга, а влезот за посетителите е слободен.

StrugaOnline