АППТ:Продолжена туристичката сезона за турските туристи, најавени се четири чартера неделно од мај до октомври  

- Македонија
136

Агенцијата за промоција и поддршка на туризмот од 5-ти до 7-ми декември го промовира македонскиот туризам на еден од најзначајните туристички пазари за македонското туристичко стопанство. На саемот за туризам “Travel Turkey Izmir” заедно со АППТ учество земаа и коегзибиторите ТА Бадемтур Балкан, Хотел Њу Стар, ДМЦ Балканс и Хотел Меркур од Тетово.

Македонскиот штанд го посети Амбасадор, г. Звонко Муцунски, Амбасада на Република Северна Македонија во Анкара. Директорот Љупчо Јаневски оствари средби со градоначалникот на Измир -Tunç Soyer и гувернерот на Измир- Erol Ayyildiz.

„На средбата со ТУРСАБ се разговараше за продолжување на успешната соработка која ја имавме оваа година со организирање на информативни патувања и најави за отпочнување на нови летови.“ – информираат од АППТ

„Од туроператорите се најавени 2- 3 чартери неделно од Измир до Скопје и Измир-Охрид со аранжмани за повеќе денови, со што очекуваме да се  зголеми бројот на ноќевања и просечен престој на турските туристи во нашава земја.“ – додаваат од таму.

Во фокус е продолжување на сезоната, а најавени се четири чартера неделно од мај до октомври. Точки на интерес за турските посетители остануваат културата, традицијата, историјата, Охрид, Скопје и се повеќе Националните паркови. Претставниците од АППТ остваруваат средби со туроператори од Турција, Кина, Малезија, Хрватска, Иран, Канада и Индија, со што се зголемува радиусот на интерес од различни туристички пазари.

Директорт Јаневски генерално очекува добра сезона кога е турскиот пазар во прашање со скок од 5% до 7% во 2020 година.

Саемот за туризам во Измир, Турција “TRAVEL TURKEY İzmir” е еден од водечките туристички настани во Турција, кој го соединува туристичкиот сектор на национално и меѓународно ниво секоја година. На “TRAVEL TURKEY İzmir” со свој простор присутни се повеќе од 1.200 изложувачи од 43 земји, 88 меѓународни изложувачи и се очекува посетеност од 44. 022 туристички професионалци. Саемската манифестација секоја година има одлична медиумска покриеност со што на изложувачите им се овозможува зајакнување на  врските со странските пазари,  во насока на постигнување на бизнис целите.

Strugaonline

 

 

 

 

 

 

 

 

 

 

 

Facebook Коментари