Синоќа Центарот за култура ,,Браќа Миладиновци“ –Струга ја имаше честа да биде домаќин на целовечерниот концерт на Националниот ансамбал за народни песни и игри ,,Танец“ во Струга.
Освен воодушевената струшка публика, своите импресии ги пренесоа и членовите на ,,Танец“.
,,Нема зборови што ќе ги опишат чувствата после прекрасен концерт. Затоа се тука фотографиите кои макар делумно ќе ги доловат впечатоците. А тие се трајни за “Танец”. Веруваме и за струшката публика која вечерва верно не следеше во Центарот за култура „Браќа Миладиновци“.“-стои во објавата на Националниот ансамбл.
„Танец“ е првиот професионален фолклорен ансамбл во Република Македонија, формиран во 1949 година со цел да ги собира и негува македонските традиционални песни и игри, народните носии и инструменти, и преку соодветен уметнички израз, сценски да ги претставува највредните форми од богатата ризница на македонскиот народ. „Танец“, име што го симболизира македонскиот народен танц (оро), е амбасадор на македонската народна уметност и култура низ целиот свет. Како подвижен музеј на нашето културно богатство, ансамблот неуморно ја шири убавината на македонските танци и песни, оставајќи свој белег на сцените во Азија, Америка, Австралија, Африка и насекаде низ Европа. Во текот на своето повеќе од седум децениско постоење, „Танец“ има учествувано на повеќе од 5.000 концерти и фестивали, настапувајќи пред полни концертни сали во Њујорк, Сиднеј, Мелбурн, Тел Авив, Рим, Париз, Лондон, Монтреал, Торонто и многу други светски метрополи.
Strugaonline
Facebook Коментари