Дуодрамата ,,За нас почнува живот” во четврток ќе се игра во Охрид

-Маж и жена се борат и лутаат низ животните патишта и никако не успеваат да ја искачат својата животна планина, да ги победат своите проблеми и таму горе на врвот да уживаат во најубавото изгрејсонце со поглед на море . И токму кога мислат дека угоре е високо, а удолу длабоко добиваат милиони на лото. И како сега понатаму…Претставата е со многу трагикомични ситуации и дијалози кои не’ потсетуваат дека животот е убав и без добивка на лото.-стои во режисерската белешка.

Се додава дека претставата се занимава со големите прашања за смислата на животот на малиот човек. Шпиро пишува како модерен Чехов, повторно за малиот човек со големи соништа. Современиот човек живее постојано со истите проблеми, очекувања и прашања. Можна ли е инстанст Можно ли е еден ден да се разбудиме и во огледалото конечно да го погледнеме идеалниот човек, победникот, бесмртниот, најубавиот…

Има ли начин конечно жабата да се погледне во огледало и да види дека е принц.

-Оваа претстава е бурно трагикомично патување низ душата на малиот човек. Претставата е смешна бидејќи таков е животот, но таа е и тажна бидејќи како што знаеме таков е животот.

Претставата не се занимава со општите и глобални теми. Светот одамна го заборави човекот. Светот престана да го бара човечкото во човекот. Секој човек е мал универзум, а ние заборавивме да зборуваме за тој мал универзум, заборавивме да се запрашаме што се случува со човекот. “За нас почнува живот” е претстава за човекот, за оној мал човек што го сретнуваме на улица секој ден , кој работи со нас или ни е роднина, за оној мал човек што го гледаме секое утро во огледалото.-објаснува режисерот.

Играат актерите Биљана Драгичевиќ Пројковска и Нино Леви.