Кадетите на РК Струга ќе учествуваат на третиот Меморијален ракометен турнир ,,Марко Божиновски 9“ што од денеска до недела се одржува во спортскиот центар ,,Марко Божиновски“ Скопје.
Годинава настапуваат осум екипи поделени во две групи. Кадетите на РК Струга се во групата Б заедно со Алкалоид Скопје, Морнар и Бутел.
Струшките ракометари првиот натпревар го играат вечерва во 21:00 часот со екипата на Алкалоид, со екипата на Бутел ќе се сретнат утре во терминот од 18:00 часот, а во недела во 9и30 часот играат против екипата на Морнар.
Турнирот се одржува во чест на Марко Божиновски, ракометар кој во 2021 година во 20-та година од животот ненадејно почина во сон како последица од срцев застој.
За да го сочуваат ликот и делото на својот син, родителите на Марко ја отворија Фондацијата „Марко Божиновски“, а оваа година започнуваат со нов проект – опремување на спортски клубови ширум Македонија со мерачи на срцевиот ритам.
-Наша мисија е да обезбедиме што е можно повеќе мерачи за што е можно повеќе спортски клубови во Македонија и на тој начин да се осигураме дека нашите млади спортисти се дополнително заштитени од кардиолошки проблеми-информираат од фондацијата.
Сите кои сакаат да донираат за реализација на овој проект можат да донираат на следниве телефонски броеви:
Strugaonline
Facebook Коментари