Советниците во Општина Струга изгласаа граѓаните да бидат ослободени од плаќање на сметките за вода за месец февруари

На продолжението на седницата на Советот на Општина Струга, одржано вчера, 13 март 2026 година, советниците донесоа одлука со која граѓаните ќе бидат ослободени од плаќање на сметките за вода за месец февруари 2026 година.

Точката на дневниот ред беше разгледана по предлог на советникот Димче Шипинкаровски од редовите на Социјалдемократски сојуз на Македонија (СДСМ), кој предложи Општина Струга да ги преземе обврските на граѓаните за подмирување на сметките за вода за овој месец.

По расправата во Советот, предлогот беше ставен на гласање и беше усвоен со 13 гласа „за“, додека 10 советници беа „воздржани“.

Во текот на дискусијата беа изнесени повеќе политички размислувања и предлози од страна на советниците, со цел да се изнајде решение кое ќе биде во интерес на граѓаните на Струга. Дел од советниците ја поддржаа мерката како начин за олеснување на товарот врз домаќинствата, додека други изразија резерви околу финансиските импликации за општинскиот буџет.

Со усвоената одлука, граѓаните на Струга нема да имаат обврска да ги платат сметките за вода за месец февруари, бидејќи тие трошоци ќе бидат покриени од буџетот на Општина Струга. Од општината се очекува во наредниот период да ги утврди деталите за спроведување на оваа одлука.

StrugaOnline