Вечерва започнува патувачкото кино на „Македокс“. Екипата патува кон струшко Радожда каде ќе биде сместен базниот камп, а од таму ќе се упатува и кон другите села кои се планирани за оваа година.
Патувачкото кино на МакеДокс ќе се одржи од први до 12-ти јули и ќе има проекции во села околу двете езера, Охридско и Преспанско езеро од македонската и од албанската страна.
Планирани се седум проекции во четири македонски и три албански населени места по следниот редослед: Лабуништа (2-ри јули), Бучимас (3-ти јули), Вишни (5-ти јули), Драслајца (6-ти јули), Пустец (7-ми јули), Луково (10-ти јули) и Лин (11-ти јули). Паралелно со проекциите на документарните филмови ќе се одвиваат и други активности, како патувачката библиотека на МакеДокс со книги собрани со донаторска акција, а кои на крајот ќе бидат донирани на основното училиште во Радожда. По проекциите во Драслајца, Пустец, Луково и Лин планирани се музички забави, а забавата за загревање ќе се одржи на 1 јули во Кингстон бар во Струга.
Паралелно со Патувачкото кино од 5-ти до 11-ти јули ќе се одвиваат сесиите на третата генерација „Докуникулци“, кои оваа година ќе работат во формат на камп за креативен документарен филм, а за прв пат и оваа платформа е поставена регионално со учество на млади од 15 до 18 години од нашата земја, но и од Србија и Албанија. Партнери на МакеДокс во овој проект се Академијата за филм и мултимедија „Маруби“ од Тирана, Албанија, и Филмскиот фестивал „Слободна зона“ од Белград, Србија.
Патувачкото кино на МакеДокс се реализира со поддршка од македонската Агенција за филм, амбасадата на Германија и овозможено е од Western Balkans Fund. Детската филмска програма во рамките на Патувачкото кино е направена во соработка со меѓународниот фестивал Док Лајпциг.
извор: Нова Македонија
фото: архива
Facebook Коментари