Денес во касарната „Јане Сандански“ во Штип ќе се одржи централна прослава по повод 33-тиот јубилеј на македонската Армија.
Повеќе од три децении исполнети со преданост, самопожртвуваност, експертиза, храброст и решителност во служба на државата ќе бидат одбележани со соодветна програма и присуство на високи државни и воени лица.
Според агендата на свеченоста, со пригоден говор пред присутните ќе се обратат претседателката Гордана Сиљановска-Давкова, премиерот Христијан Мицкоски, министерот за одбрана Владо Мисајловски и командантот на генералштабот, генерал-мајор Сашко Лафчиски.
На главната свеченост ќе бидат наредени и новоименуваните 26 потпоручници и 149 подофицери.
За време на главната свеченост, претседателката Сиљановска-Давкова, како што извести Генералштабот на Армијата, ќе го награди со „Орден за воени заслуги“ Центарот за обука на питомци и офицери, кој е дел од Командата за обука и доктрини.
За роденден на Армијата е избран 18-ти август, денот кога во 1943 година на Славеј Планина бил формиран баталјонот „Мирче Ацев“. Процесот за формирање на современата армија на земјава започна во 1992 година, кога тогашниот претседател Киро Глигоров, со раководството на ЈНА го потпиша Договорот за дислокација на федералната армија од територијата на државата. Македонската Армија денес заедно со армиите на уште 29 земји е составен дел од најголемиот колективнен безбедносен систем откако во март годинава земјава стана 30 полноправна членка на НАТО.
StrugaOnline
Facebook Коментари