Тројца млади ракометари на РК Струга со повик во кадетската репрезентација на Македонија

Тројца млади ракометари на РК „Струга“ добија повик за машката репрезентација на Македонија до 16 години (М-16), откако селекторот Никола Матлиески ги вклучи во списокот на играчи за претстојните подготовки во рамките на ЕХФ неделата.

Станува збор за Јордан Танаскоски, Горазд Ојлески и Матеј Ковачески, кои ќе имаат можност да го облечат националниот дрес и да бидат дел од репрезентативниот собир.

Овој повик претставува големо признание за младите ракометари, нивниот досегашен труд, посветеност и напорна работа, но истовремено е и потврда за квалитетната работа со младите категории во РК „Струга“.

За струшкиот клуб ова е уште една потврда дека располага со талентирани млади ракометари кои имаат потенцијал да бидат дел од националните селекции и да ја претставуваат Македонија на меѓународната сцена.

Од РК „Струга“ им упатија искрени честитки на Танаскоски, Ојлески и Ковачески, посакувајќи им успешни подготовки, многу нови предизвици и уште многу настапи во дресот на македонската репрезентација.

Струга продолжува да биде расадник на млади ракометни таленти!

StrugaOnline