Ана Ашталкоска со награда „Миладиновско слово“ за најдобар млад поет

Струшката гимназијалка Ана Ашталкоска, ученичка во СОУ Гимназија „Ибрахим Темо“ – Струга, го освои признанието „Миладиновско слово“ за најдобар млад поет, во рамки на поетската манифестација „Браќа Миладиновци – Миладиновско слово“.

Во Домот на културата во Струга, во знак на почит кон книжевното наследство на браќата Димитар и Константин Миладиновци, се одржа свечена промоција на новиот „Зборник“, издание посветено на значајниот јубилеј – 165 години од објавувањето на Зборникот на браќата Миладиновци.

Меѓу младите автори кои со своето творештво го продолжуваат духот на пишаниот збор се најде и Ана Ашталкоска, која со својата поетска творба го освои признанието за најдобар млад поет. Наградата претставува значајно признание за нејзиниот творечки потенцијал и потврда дека книжевниот збор и поетското творештво продолжуваат да живеат и меѓу најмладите генерации.

Настанот беше организиран од Фондацијата „Браќа Миладиновци – Миладиновско слово“, а новиот „Зборник“, под уредништво на Марија Савеска и Билјана Мартиновска, произлезе од литературен конкурс инспириран од животот, делото и културното наследство на Миладиновци.

Свечената програма ги обедини книжевноста, музиката и народното творештво, поврзувајќи го богатото наследство од минатото со современиот авторски израз. Пред присутните беа претставени избрани народни песни од оригиналниот Зборник на Миладиновци, како и поетски и есеистички творби на современи автори застапени во новото издание.

На свеченоста се обрати Ристе Миладин, основач и претседател на Фондацијата „Браќа Миладиновци – Миладиновско слово“ и директен потомок на Миладиновци, кој говореше за значењето на нивното дело и потребата од негово континуирано негување, промовирање и пренесување на идните генерации.

Признанието за Ана Ашталкоска е уште еден показател дека Струга и нејзините млади продолжуваат да го негуваат книжевниот и културниот дух на градот, но и дека наследството на Миладиновци добива нов живот преку творештвото на младите автори.

Од зборот на Миладиновци до зборот на новите генерации – 165 години подоцна, поезијата продолжува да го чува живото сеќавање на едно од најзначајните книжевни наследства.

StrugaOnline