Македонската машка ракометна репрезентација вчера ги започна подготовките за бараж-дуелите со Романија (в недела во Скопје и на 13 јуни во Клуж) за пласман на Светското првенство в година во Германија и во Данска.
На подготовките Гонзалес на располагање ќе има 20 ракометари, а поради обврски кон своите клубови Вецлар и Левен, првите тренинзи од подготовките ќе ги пропуштат централниот бек Филип Миркуловски и левиот бек Филип Талески.
За подготовка на репрезентацијата, Гонзалес и стручниот штаб на располагање ќе имаат шест дена, во кои ќе се работи на техничко-тактичка синхронизација на селекцијата, за да може на дело да се реализира тактика предвидена за двата бараж дуели.
Пред првиот тренинг на сениорската репрезентација, со подготовки почна и комбинираната репрезентација, која ќе ја претставува Македонија на Медитеранските игри во Тарагона, Шпанија.
Репрезентативците што не се дел од А-селекцијата ќе работат под водство на Роберто Парондо Гарсија, а по завршувањето на квалификациските бараж-мечеви со Романија репрезентацијата ќе се комплетира. На медитеранскиот список го нема Филип Талески, па лидери на селекцијата во Тарагона се очекува да бидат Жарко Пешевски, Филип Кузмановски и Гоце Ојлески.
Извор: rkmetalurg.mk
Facebook Коментари