Граѓаните повторно ќе можат да поднесуваат барања за приватизација на земјиште во државна сопственост. Министерството за финансии подготви измени на Законот за приватизација и закуп на градежно земјиште во државна сопственост, со кои се пролонгира рокот за поднесување на барање за приватизација на земјиштето. Со измените се даваат дополнителни три години рок, односно можност барањата да се поднесуваат до 31.12.2021 година. Инаку рокот за поднесување на барања истече на 15 декември 2014 година и од тој датум досега не можеа да се поднесуваат барања за приватизација.
„Во изминатиот период пристигнаа многу реакции од граѓани кои не успеале да го запазат рокот за поднесување барање за приватизација. Станува збор за граѓани кои живееле во странство, но и граѓани кои живеат во земјава а не успеале да поднесат барање во рокот. Со цел да им се излезе во пресрет, изготвени се предлог законски измени за кои денеска започнува комисиска расправа во Собрание, каде же бидат образложени од замник министерката Ширет Елези.
Бидејќи се продолжува рокот за поднесување барања, се пролонгираат и примените на одредбите за закуп, односно се одложува утврдување на кирија за оние кои нема да го приватизираат земјиштето.“ – информираат од министерството.
Освен рокот за барања за приватизација, се пролонгира и рокот за поднесување пријава за промена од корисничко право во право на сопственост. Рокот за ова барање се пролонгира до 31 декември 2022 година.
Исто така, се продолжува и рокот за барање за промена на барателот на приватизација на градежно земјиште. На пример, ако едно лице купи објект кое се наоѓа на земјиште кое е во постапка на приватизација, со измените на законот наместо 30 ќе му стојат на располагање 60 дена за поднесување на барање за промена на барател за приватизација. Досегашната примена на законот покажала дека рокот од 30 дена е прекраток, па измените со измените се излегува во пресрет на граѓаните.
Законските измени денеска влегуваат на комисиска расправа во Собрание и ќе ги образложи заменик министерката Ширет Елези.
Strugaonline
Facebook Коментари