Општинската организација на Црвениот крст во Струга изминатата 2016 година собрала 2.138 крвни единици што е за 32 повеќе од претходната година.
Секретарот на Струшкиот Црвен крст Адуриме Даути информира дека со оваа бројка е надминат годишниот план кој го има секој град во однос на бројот на жители.
– Според годишниот план Црвениот крст – Струга има обврска да собере 1.800 крвни единици или три проценти во однос на жителите во општината. Оваа бројка ја надминуваме и последните години имаме пораст што значи се подига свеста кај граѓаните за хуманост, но и успешно го релизираме годишниот план, истакна Даути.
Крводарителски акции, додаде, се организираат два пати месечно преку цела година во институциите, училиштата, во летен период на плажите, но, како што нагласи, граѓаните ги посетуваат центрите за трансфузија и даруваат крв и надвор од организираните акции.
– Соработката со трансфузиолозите и центрите за трансфузија е на високо ниво. Редовно има акции за крводарување и никогаш не сме дошле до недостаток на крв и во состојба за ургентно дарување, подвлече Даути.
За големиот интерес за крводарување, според неа, кажува и бројката со над пет, 10, 25 и 50 дарувања на едно лице. Со најмногу дарувања или над 100 е стружанецот Благоја Јованоски, кој на Денот на краводарителите на Македонија минатата година имал 106 крводарувања.
Facebook Коментари